Keppni í heppni.

Próf og aðrar spurningakeppnir eru oftar en ekki keppni í heppni. Ég fór á taugum í fyrrakvöld þegar ég áttaði mig á að ég þekkti ekki orð eins og grunnþáttur, orðasafnsþáttur, aðlögunarþáttur, formdeildir og fleira og fleira sem ég hafði aldrei séð í íslensku máli fyrr en nú í vetur. Ég sá sæng mína uppreidda og íhugaði í sjúkrapróf í nokkrar mínútur en hugsaði svo, æ, það verður svo gott að losna við þetta námskeið ef ég skríð yfir fimm. Ég læt reyna á það. Svo fór ég að bæta öllum þessum skrítnu merkingarlausu orðum í orðasafnið mitt samhliða því að rifja upp ýmis hugtök og formdeildir íslenskrar tungu sem ég átti að kunna þegar ég mætti í HÍ í fyrsta skipti. Ég er orðin ansi ryðguð og sumt man ég bara ekki eftir að hafa lært. Ekki nema vona að námið væri tímafrekt í vetur þegar ég var að læra efni námskeiðsins og undirstöðuatriðin fyrir það líka.

Ég er búin að fara út að ganga með kennimyndum sagna og teikna kennimyndir nafnorða í hálft fiðrildi (eða 0,75  sinnum X eftir því hvernig á það er litið) það er merkilega líkt fiðrildalíkani  Greimas, svona á blaði,  og yfir morgunmatnum skrifaði ég á miða að hugtakið yfir innbyggðar einingar sem kerfisbundið koma í ljós í málkerfinu séu formdeildir.  Útskýrði það svo nokkrum sinnum fyrir kettinum og það dugði mér til að muna skýringuna alveg þangað til núna. 

Ég var heppin, ég þurfti að svara því í prófi hvað formdeildir merkir og auðvitað taka nokkur dæmi um beygingarformdeildir og svona hitt og þetta. Hluta af þvi mundi ég frá því í gær og í morgun, sumt vissi ég að ég átti að vita en mundi ekki en ég var heppin því allar spurningarnar sem ég hafði engin svör við komu ekki í þessu prófi.  Ég treysti á að ég hafi haft 50 % af hverri spurningu rétt, prófinu sé náð svo ég henti öllum glósum í ruslið þegar ég koma heim (auðvitað á ég þær í tölvunni) 

Þá er að snúa sér að varðveislu miðaldasagna og ekki verra að læra nokkur AM og GKS númer svona til að slá um sig með.  

Esjan er á sínum stað og þangað stefni  ég snemma í fyrramálið, svo snemma að ég deili göngustígnum bara með rjúpunum, sem stundum hafa flogið óþægilega nálægt nefinu á mér.