Bíó og skipulag

Ég ákvað að sinna einhverju af öllu því sem ég hef tekið að mér, hringdi í litlu frænku mína og við ákváðum að fara í bíó. Hún er búin að sjá Mamma Mía einu sinni en ég aldrei og við ákváðum að fara klukkan 2.
Á undan og eftir því símtali er ég búin að sitja og stúdera póstforritði í tölvunni minni og æfa mig í að nota það sem skipuleggjara. Það er auðvitað rugl og bull að vera ekki búin að læra á þetta fyrir löngu. Skipulagsóráðsía er ein af mínum veiku hliðum, önnur er gleymska og þegar þetta tvennt leggst saman er ekki von á góðu.
Þess vegna er ég að setja allt sem ég á að gera inn á dagatalið í Outlook og lita það, grænt og gult og blátt og fjólublátt. Þar sem ég er með þetta forrit opið fyrir framan mig í vinnunni alla daga og tossalistinn og dagatalið blasir við mér eru talsverðar líkur á að ég muni hvað ég ætlaði að gera frá degi til dags. Nú er bara að muna að uppfæra.
Svo sá ég á fésinu að það er handverkssýning í Ráðhúsi Reykjavíkur um næstu helgi og ég er að spá í að fara einhvern daginn. Ég þekki einhverstaðar Urtu sem vill kannski koma með.
Svo hefði ég þurft að skipuleggja eitthvað með Litlu fræknku næsta mánuðinn. Ég tók jú að mér að ,,rjúfa félagslega einangrun"

Óbreytt ástand

á hitakerfinu. Einn af pípurunum í ættinni kom við í gær til að athuga hvort ekki væri ,,framhjáhlaup" á hitaveitugrindinni en það reyndist ekki vera svo við drukkum te og skoðuðum jeppaferðalagamyndir fram eftir kvöldi. Frændi kvaddi svo með þeim orðum að klukkan væri að verða ellefu og hann hefði getað verið búinn að gera við hitakerfið ef hann hefði byrjað á því þegar hann kom.
Það bjargaði tánum á mér frá kali í nótt að ég á rafmagnshitapoka.
Frændi ætlar svo að mæta seinnipartinn í dag til að gera við. Það er mín helsta tilhlökkun í dag að fá hita í húsið.

Uppleið

Ísskápurinn er hættur að slá út rafmagninu, hitablásarinn sem ég fékk lánaðann í dag hækkar hitastigið í íbúðinni aðeins og við ætlum að láta hann ganga í nótt svo við komumst fram úr rúmunum í fyrramálið.

Ófullgerð pottrett mynd af Francis Bacon seldist á miljarð (líklega reiknað á gengi dagsins í dag) en mér finnst athyglisvert að sjá hvernig Lucien Freud vann myndina.

Ráðherrar funda og Össur segir Ísland ekki vera á leið á brunaútsölu. Ég forðast að hugsa um ástandið og hvernig veturinn verður en er ákveðin í að henda ekki neinu matarkyns á næstunni. Best að æfa sig í að lifa spart, mér finnst bygggrautur betri morgunmatur en sérios og bygg er íslensk framleiðsla. Flubbinn eldaði morgungraut Gabríels áðan og ég bíð spennt eftir að smakka hann í fyrramálið.

Annars er ég með svefnsýki, ég held að það fylgji kvefi og hálsbólguvottinum sem ég hef fundið fyrir síðustu daga.

Ég fékk grautaruppskriftina lánaða af síðunni hjá Blómaval og sá í leiðinni uppskrift að rauðrófusalati. Ég er að hugsa um að lesa hana áður en ég skríð undir sængina.
Morgungrautur Gabríels
3 dl bankabygg

9 dl vatn

2 epli skorin í litla teninga

1-2 dl rúsínur

1 msk. kanill

2 tsk. salt

1-2 dl fræ eftir smekk, t.d. sólblómafræ og/eða graskersfræ.

(+ 2 tsk. hunang og 1 dl döðlur fyrir sælkerana)

Hráefnið er allt sett í pott t.d. að kvöldi og suðan látin koma vel upp, síðan er slökkt undir, lokið sett á pottinn og farið að sofa. Að morgni þarf bara að hita grautinn upp og borða t.d. með mjólk (en það er ekki síðra að borða hann kaldan) eða nota sem múslí á súrmjólkina. Grauturinn þolir vel geymslu í kæli svo tilvalið er að sjóða hann til nokkurra daga í einu.

Kuldaboli

Hér er kalt. Einn píparinn úr fjölskyldunni kom í heimsókn og skoðaði ofna og hitaveitugrindur og þrýstijafnara og ég veit ekki hvað og hvað en hitinn hækkaði ekkert í íbúðinni.
Hinn píparinn, sá sem rekur fyrirtækið sagði hvort við mæðgur værum ekki vanar útivistarmanneskjur og gætum lifað við þetta í einhverja daga. En svo ætla þeir að reyna að koma í vikunni vopnaðir þrýstijafnara og einhverju fleiru og reyna að koma þessu í stand fyrir veturinn.
Ég vildi ekki beita miklum þrýstingi og segja með tannaglamri að kuldi væri ekki góður fyrir gigtarsjúklinga en hótað aftur á móti að hringja daglega þangað til þeir kæmu og redduðu málum.

Ég var annars einusinni að vinna í fyrirtæki sem skaffaði mér hitablásara á skrifstofuna, kannski ég ætt að fá hann lánaðan, nema Byko sé opið ennþá.

Ok

Ég er komin heim frá Kanada!
Þreytt, mörgum krónum fáækari, tveimur rennilásum ríkari, draghölt og skökk. Held fast í þá sannfæringu að koníak sé besta meðalið við hálsbólgu og ætla að gera eitthvað annað á morgun en vinna.

Hékk á facebook áðan í eilífðartíma til að henda út hinum og þessum tilboðum og viðbótum sem ég er búin að safna að mér gegnum tíðina af forvitni einni saman.
Mig undrar stórum hvað margir vinir mínir hafa góðan tima til að skemmta sér við hinar og þessar sendingar á ,,Fésinu". Eina sendingu gat ég þó ekki staðist , lái mér það hver sem vill.

Ég tek nú samviskusamlega allar mínar myndir í raw en vantar fortit til að færa þær yfir í jpg og laga þær til. Þess vegna eru engar myndir úr ferðalaginu til sýnis.
Eiginlega er ég fúl við sjálfa mig hvað mér eru mislagðar hendur við myndatöku. Ég þarf sjálfsagt að lesa glósurnar af námskeiðinu, handbókina með myndavélinni og arka svo út í bláinn með myndavél og kannski þrífót.
Kannski á morgun.

Gulrætur

Það svarar ekki á Seltjarnarnesinu og ég sem er að reyna að losna við gulrætur þangað.

Farin

Ætla að gleyma íslensku efnahagslífi í nokkra daga, kem vonandi endurnærð til baka.

Sokkarnir

Það er alveg þess virði að fara til Kanada til að koma því í verk að taka til í sokkaskúffunni. Ég fann fullt af samstæðum sokkum.
Já og því til viðbótar er ég búin að fara í þrjá banka í fjórum ferðum í dag og skrapa saman kanadadollara á misjöfnu verði. Hafði reyndar ekkert upp úr krafsinu í helminginn af þessum ferðum en hinar dugðu mér til að eiga fyrir pulsu og kaffi annað slagið í ferðinni. Morgunmatur er innifalinn í hótelgistingunni og það var búið að borga matinn á árshátíðinni sem og ýmsan annan kostnað áður en ósköpin dundu yfir svo við ættum að komast þokkalega af fram á mánudag.
Ég var að ræða það hérna heima áðan að ég þyrfti að taka með mér tölvu og Flubbakrílið hristi hausinn yfir vitleysunni í mér en nú man ég hvað ég ætlaði að nota hana. Ef ég tek myndir í raw gæti ég þurft að tæma vélina og ........... Nei annars kannski ekki og þó. Mér samt gott að komast á netið og lesa um bankastríð breta og íslendinga án þess að þurfa að leyta að netkaffi.

Þreytt-pirruð og á eftir að pakka.

37 ára.

Ég fletti gömlum bréfum í sumar. Á eitt þeirra var teiknuð kveðja til mín, útlínur af lítilli hendi.
,,Ef ég fer upp á fjall með veiðistöngina gæti ég náð tunglinu" sagði hann eitt kvöld þegar fullt tunglið nam við fjallsbrúnina.
Ég hitti hann á sjö ára afmælinu 7. október. Síðan nokkrum dögum seinna heilsuðumst við og kvöddumst við örstutt stans á þjóðveginum. Ég vissi ekki að það yrði síðasta kveðjan.
30 ár.

4.október

Svart malbik
hulið haustlaufi
blönduðu reyniberjum

3.okóber

Snjóþvegin veröld mætir morgunbirtunni
Kona í rauðri kápu bíður við gangstéttar brún.

2.október

Eldlitt mætir kjarrið úlfgráum himni
Grænn smábíll þokast áfram
fyrir mannafli