Hætt, búin.

Ekki fleiri námskeið í bili!
Ég hef ekki einu sinni haft tíma til að blogga.
Geri það þegar ég verð búin að jafna mig betur eftir síðustu törn.

Gott er að eiga góða að.

Ég hélt margra daga afmælisveislu í tilefni mánudagsins. Vegna gífurlegs félagslegs þrýsings á vinnustað þorði ég ekki annað en færa vinnufélögunum eitthvað með kaffinu en ,,svindlaði” aðeins og bætti afmæliskaffinu við föstudagskaffið.
Á sunnudag var ég búin að plana að elda eitthvað gott fyrir fjölskylduna og einn Sjúkraliða með viðhengi en af óviðráðanlegum orsökum skreið ég undir sængina mína seinnihluta sunnudagsins og lét aðra um að elda matinn. Þau stóðu sig eins og hetjur og sáu alveg um að elda matinn sem ég ætlaði að bjóða þeim í og höfðu svo mikið við að ofnbaka sérstaklega grænmeti sem enginn borðar nema ég og bættu líka í það ávexti sem ekkert þeirra skilur að ég skuli vilja hafa í grænmetinu mínu. Það eru svona smáatriði sem sýna hugulsemi.
Þau lögðu til ávexti, osta og rauðvín sem var ekki á upphaflega matseðlinum hjá mér og eyddu með mér notalegri kvöldstund. Að vísu varð einhver misskilningur hjá syninum og tengdadóttirinni, þau áttuðu sig ekki á tilefninu og hún sat ein heima yfir skólabókum.
Þessi misskilningur varð auðvitað til þess að ég bakaði pönnukökur fyrir þau í gærkveldi og þar með var kominn þriðji í afmæli.
Ég á Útivistarbókina og ég á tvo heilsukodda og það er nokkuð ljóst að mínir nánustu vita hvað mér kemur.
Mér finnst ég vera ríkasta manneskja sem ég þekki.

Félagsvist annaðkvöld

Núna væri ég alveg til í að skrópa á mínum venjulega stað á morgun og mæta bara í félagsvisst í staðin.
Skyldi Kennaraneminn hafa tíma til að rifja upp kunnáttuna. Nei annars hún á að skila verkefni á miðvikudag.

20. mars og ekki jafndægri á vori

Ég fékk svohljóðandi sms áðan.

Ekki er hún alveg fædd í gær
ellimörkin færast nær og nær
Meira eflaust mætti semja
mun þó skáldgyðjuna hemja.
Frá Hlídarhúsi kveðjur fær,
til hamingju systir kær.


Þetta kom mér svolítið í opna skjöldu, ég vissi ekki að litli bróðir minn dundaði sé við að berja saman vísur. Hélt að hann væri aðallega í að berja á nagla.

Svo í tilefni dagsins bókaði ég far til Parísar og verð þar frá 9 til 16 júní!
Ég vona að það verði ekki hitabylgja á svæðinu á þeim tíma en ég fer nú í Effelturninn og Shakespeare and Copmpany hvað sem tautar og raular.

Ég þykist hafa rekist á það einhverstaðar að það væri ekki jafndægri á vori fyrr en á morgun og það er varla að ég trúi þvi. Ég er vönust því að það sé 20 mars. Ég þarf að finna alvöru dagatal.

Ég lagði drög að útsaumsmynstri í gærkvöld og fyrirmyndin var sama plantan og Jón Baldur Hlíðberg teiknaði myndina af sem er hérna til hliðar.
Ég vona að það varði ekki við lög um höfundarrétt að linka inn á myndir annara enda kemur greinilega fram hver er höfundurinn og þetta verður að duga þangað til ég er komin með mynd af minni eigin teikningu.
Það þarf að laga teikninguna til og betrumbæta aðeins en ef ég fæ annað duganaðarkast um helgina þarf ég að fara að fá efnið til að færa munstrið yfir á það.
Svo Kennaranema-sjúkraliði það þarf að strauja og sníða svo úr verði áklæði!

Sirkus

Fyrirsögn í nýlegu fréttablaði kveikti á einhverjum hugrenningatengslum um sirkussýningar.
Fyrir nokkrum árum var sífellt talað um Sirkusinn við Austurvöll en nú heyrist sjaldan eða aldrei á það minnst. Þingmönnum virðist hafa tekist að breyta ímynd sinni og væntanlega til hins betra, ætli þeir hafi fengið ráðgjafafyrirtæki til að setja upp prógramm fyrir þingið?
Meðan Alþingi dregur sig í hlé af sirkussviðinu sækja aðrir inn á það og má þá helst telja fjölmiðla og saksóknara. Ekki amalegur kokteill það. Ég er enn of hugsi yfir hraðskák hins opinbera við Bausgsveldið til að koma upp orði þar um en flugeldasýningar fjölmiðla vegna dauðra álfta, uppgjafa hamskera og útrýmingarherferðum frístundafuglabænda verður varla lýst nema með þessu eina orði, SIRKUS.
Hálfdauð álft sást á floti í Hafnarfirðinum og fjölmiðlum fanst fréttaefni að ekki skildi hafa verið leitað að fuglaflensusmiti í hræinu sem greinilega hafði orðið fyrir bíl.
Ég velti því fyrir mér þessa dagana hvort fjölmiðlar beri enga ábyrgð á þvi sem þeir kalla fréttaflutning og þá meina ég þeim áhrifum sem síendurteknar fréttir af ætluðum heimsfaraldri hafa. Börn og aðrir sem hafa ekki dómgreind til að vingsa úr þvælunni það sem er einhver fótur fyrir og gera sér ekki grein fyrir smitleiðum og raunverulegri hættu fuglaflensunnar sitja uppi með hræðslu við eitthvað sem enginn veit hvort, hvernig eða hvenær veður.
(og þar sem blogger.com skammtar mér stærðina á pistlunum verður þetta framhaldssaga)

Sirkusframhald

Ég minnist þess ekki að hafa séð mikið af málefnalegri eða vitrænni umfjöllun um fuglaflensuna á síðum blaða. Kannski er ég ekki að fá rétt blöð inn um bréfalúguna og þyrfti að enduskoða það mál en væri til of mikils mælst að blöðin og meira að segja fríblöðin gerðu almenningi grein fyrir því hvenær og hvernig fuglaflensa gæti borist til landsins og hvernig best væri að haga sér við þær aðstæður. Reyndar veit ég að upplýsingar um smitleiðir frá dýrum til manna eru óljósar en smitleiðir til Íslands eru nokkuð greinilegar.
Hvernig væri að í stað hræðsluáróðurs kæmi fræðsla og upplýsingar á síðum blaðanna. Til dæmis mætti segja börnum að það sé í góðu lagi að gefa öndunum en ekki skríða á fjórum fótum um tjarnarbakkann og alls ekki bíta hausinn af öndunum þegar þær teygja sig eftir brauðinu úr hendi gjafarans.

Ekki orðin

sjötug og búin að finna veflykilinn minn og fara yfir skattaframtalið á netinu, fylla út tvo reiti og er í þann veginn að skila. Fyrst þarf að prenta svo er að skila.
Það fylgir þessu nú hálfgerð tómleikatilfinning. Eftir að hafa frá 16 ára aldri og þangað til fyrir nokkrum árum síðan verið með þessa árlegu ónota- spennu- skattaskýrslutilfinningu vikum og jafnvel mánuðum saman er þetta ekkert mál lengur. Aðaláhyggjuefnið er að finna veflykilinn sinn og smella svo á prenta og senda takkana á síðunni.
Það eru nú ýkjur að skattaskýrslurnar séu pappírslausar, mér finnst allavega ég þurfa að prenta út ansi stóran haug af pappír.

Tíminn er eins og ...

Það er eiginlega full þörf á því að setja bremsu á tímann núna. Ef fer sem fram horfir verð ég orðin sjötug áður en ég næ að klára skattaskýrsluna mína fyrir þetta ár!