Miðvikudagur

,,Hyllir uppi öldufalda austurleiðir vil ég halda"
Ég á pantað flug á morgun og til baka á mánudagsmorgun.
Ég er búin að fá yfir mig nóg í dag og veit ekkert hvort ég fer i vinnu á morgun. Það var reyndar ekki vinnan sem slík sem gerði daginn erfiðan, hálfu verra var bílleysi minna nánustu. Púff.
Ég held að ég þurfi að fara út úr bænum til að hvíla mig og verð þá bara að missa af myrkvuninni annað kvöld. Ég verð hvort sem er þar sem ekki þarf að slökkva nein ljós til að sjá stjörnurnar.

Bilun

Skildi þetta vera komið í lag?

Birtan var skrítin þegar ég vakanaði í morgun, hvít birta eins og fylgir snjókomu, ég þóttist jafnvel finna lyktina af væntanlegri snjókomu. Enn var logn á Kópavoginum, fugl og fugl á stangli, fleiri þó innar við voginn. Annað slagið heyrðist hljóð eins og eitthvað væri að stinga sér en þegar betur var að gáð var það eitthvað sem rak sporð eða ugga upp úr sjónum með gusugangi, hvarf svo undir yfirborðið aftur.
Þegar leið á morguninn hörfaði þessi hvíta birta undan sólinni.
Ég sat úti dágóða stund seinniparatinn og hefði setið lengur ef trjáplöntuóværan í næstu görðum hefði ekki kastað skugga í garðinn hjá mér.
Tölvunarfræðingurinn er á bílnum mínum og ég ekki í hjólhæfu ástandi svo ég fer ekki í fósturgarðinn til að njóta góða veðursins lengur.
Ég minnist þess ekki að hafa getað setið úti léttklædd og sólað mig á þessum árstíma fyrr.
Kannski hef ég bara ekki haft tíma til þess.

Aðrir grannar

Ég verð nú þó að viðurkenna að þessi nábúi minn sem stóð nakinn við að vaska upp eftir morgunmatinn klukkan sjö i morgun gerði morgungönguna fjörlegri en vanalega. Ég verð að breyta gönguleiðinni oftar.

Grannar

Stundum væri mér sama þó nágrannar mínir væru orðnir nágrannar annara.

Sagnir

Latneskar sagnir skiptast í fjóra flokka og sá fyrsti, a-stofn, hefur endingarnar o, s, t. mus, tis, nt í nútíð fystu til þriðju pers. eintölu og fleirtölu.

Ég er ekki viss um að ég geti nokkurntíma munað heitin á þessum fimm föllum í latínunni!

Ég er nú samt búin með fyrsta verkefnið, bara eftir að skila.

Heimþrá

Búin að labba örstuttan hring í morgun, keyra Tölvunarfræðinnn eftir bílnum hennar, leggja mig aftur og fara svo í sturtu. Þetta eru heilmikil afköst fyrir klukkan 10 að morgni.

Mig langar austur! Sjúkraliðinn og Kennarinn vilja bæði koma með mér á föstudaginn en Sjúkraliðinn er því miður að vinna til hálf fjögur og það er svolítið seint að fara af stað þá. Mér finnst hún ætti bara að fá að fara fyrr. Fær hún ekki allt sem hún vill í vinnunni?
Píparann langar líka til að fara með allan barnaskarann og veðrið verður svona áfram held ég að ég standist ekki mátið og drífi mig.
Mér var tjáð að það yrði allt vitlaust um næstu helgi á svæðinu, það á að smala. Ég geri örugglega ekki mikið gagn þar en kannski get ég að sigað þeim hinum út og suður.
Þetta kemur allt í ljós, það ræðst af heilsufari, veðri og vindum.

Mánudagsmorgun

Það er hlýtt og logn og þegar dagurinn er að hrekja nóttina burt er fallegt við Kópavoginn. Háflóð og ljósin í nýja bryggjuhverfinu í Garðabænum speglast í sjónum meðan byggingarnar þar keppast við að yfirgnæfa Keili og Dyngjurnar. Þeim tekst það ekki- ekki enn og vonandi aldrei.
Flest húsin sem eru byggð hérna niðri við sjóinn eru byggð með bátaskýlum. Aðeins eitt þeirra hefur haldið eða fengið að halda aðgengi að skýlinu þegar göngustígurinn var lagður, þar hefur verið brúað yfir rásina upp að húsinu og núna á háflóði lá sjórinn upp að dyrum.
Ég væri til í að eiga það hús og bát með.

Ber, berjum, berja, -sulta.

Á þessum stundum of langa sólahring er ég búin að búa til mislukkaða sultu úr restinni af aðalbláberjunum sem mér voru gefin og af því hún var mislukkuð notaði ég slatta af henni sem bragðefni í ís sem var ágættlega lukkaður.
Hreinsaði svo upp kræki-bláberja blönduna sem ég fékk senda í sömu ferð. Held að ég hafi ekki orku til að gera eitt handtak í viðbót.
Í þeim töluðu orðum ákvað loðdýrið að nú væri komið að því að hreinsa háravöndlana úr meltingarveginum svo ég greip hann á lofti og hentist af stað með hann inn á bað. Mér finnst hann ekki of góður til að skilja þetta eftir sig á þægilegri stað en stofugólfinu. Leiðin var of löng og ég nærri flogin á hausinn í því sem gusaðist niður á leiðinni. Það hefði verið skemmtilegt til frásagnar ef ég hefði slengst aftur fyrir mig á gólfið og rifið upp hálfgróin götin.
Ég bendi þeim sem hafa áhuga á að fá sér kafloðin gæludýr að þau þurfa að hreinsa upp úr sér hárin sem lenda ofan í þeim við dagleg þrif. Því loðnari því meira að hreinsa!

Átján tíma sólahringur væri hæfilega langur fyrir mig núna.

Umhyggja

Hér kom Sjúkraliði í dag til að hressa upp á mig. Hún fór ekki fyrr en mörgum tímum seinna þegar hún var búin að fara og kaupa handa mér kaffi, hella uppá, elda handa mér og borða með mér og vaska upp eftir matinn. Hún lofaði að færa mér Moggann þegar hún væri búin að rölta heilsuröltið sitt með hann og ég held ég gefi henni ís og granateplafræ í desert. Ég hafði það af að útbúa það.

Sjúkraliðinn segir að ég sé veikluleg, grá og guggin! Hún sagði mér það að vísu ekki, ég frétti það eftir henni utan úr bæ. Við hverju bjóst hún eiginlega? Að ég væri eins og blóm í eggi, tilbúin að trimma um fjöll og fyrnindi eftir að hafa verið rekin á hol, ekki einu sinni, ekki tvisvar, heldur fjórum sinnum.
Ég er með harðsperrur í maganum og enga orku í kroppnum. Fór aðeins út í blóma-föndurbúð í dag til að kaupa það sem vantaði í handavinnuna mína. Var við það á tímabili að fara og biðja um hjólastól en hætti við að láta líða yfir mig og hékk upprétt þangað til bílstjórinn minn kom aftur, hann þurfti nefnilega að skilja mig eftir meðan hann sinnti nauðsynlegri erindum.
Það var samt gott að komast aðeins út það er nefnilega hundleiðinlegt að vera veikur heima, þá er ekkert hægt að gera nema vera veikur og þó kötturinn sé voða ánægður með að hafa mig í horninu finnst mér hann frekar fámáll.
Ég er ákveðin í að láta mér batna svo hratt að ég geti farið og unnið hálfan daginn fljótlega eftir helgina.

Farin og komin

Þrátt fyrir hálsbólgu og lítilsháttar kvef var ég hitalaust og mátti fara og missa gallblöðruna. Fór í gærmorgun á LHS og komin heim í dag. Götótt, röndótt af joði og gangandi í keng en annars stálsleginn og berst við þá tilfinningu að ég hafi nú ekki verið neitt voðalega veik og til hvers ég hafi þá verið að fara í aðgerð. Bendi svo sjálfri mér á að heimilislæknirinn hafi haft rétt fyrir sér að gallsteinar hyrfu ekki og þetta gæti versnað svo að það þyrfti að skera hálfa síðuna úr til að komast að því.
Svo ég fór og kom heim aftur gallblöðrulaus og ætla að dunda mér með prjóna og latínumálfræði í sófahorninu næstu daga.
Annars er ég komin með nýja þráhyggju, mig langar í silkiband til að orkera úr og VERÐ að fara í Storkinn við fyrsta tækifæri og kaupa mér smávegis af því.

Svo vantar mig ráðningu á gátu sem hljóðar einhvernveginn svona Oreshus+ og Oreshus+, hvernig getur sú blanda myndað mótefni. Ég held ég verði að útvega mér spæjara með meinatæknimenntun. Tölvunarflubbinn þekkir einn, ég held ég athugi hvað hún hefur góð sambönd.

Mikið djöf. langar mig í súkkulaði þennan morguninn!

Mánudagur

Ég vaknaði rétt fyrir sex í morgun og dreif mig út að labba. Bara að fara nógu hratt í fötin og út svo maður nái ekki að skipta um skoðun. Það var veðurhljóð á glugganum mínum og í trjánum úti en það var frábært veður, hlýtt og hressandi rok.
Dagurinn byrjaði sem sagt vel en stefnir í að enda ekki eins vel, ég er komin með hálsbólgu og kvef og það er bara logandi sárt að kyngja. Skyldi maður fá að fara í því ástandið í svæfingu og aðgerð?
Skrambans.

Ójafnvægi

Ég er í orkulegu ójafnvægi. Vaknaði í gærmorgun uppfull af orku og dreif mig og Sjúkraliðann út í göngutúr fór svo heim og djöflaðist í hinu og þessu sem þurfti að gera og seinnipartinn var ég búin af tanknum og hélt varla höfði. Fór samt út að hjóla í gærkvöld með Sjúkraliðanum því hún er komin með eftirsjá eftir sumri sem er að verða búið og hún átt eftir að njóta þess og gera svo margt. Ég kannast eitthvað við þetta.
Í morgun vaknaði ég svo óúthvíld og orkulaus.
Mér finnst þetta fjári fúlt.

Leitarorðin

Jæja Sjúkraliði, svona lítur þetta út. Þetta eru síðustu 20 leitarorðin sem hafa leitt fólk inn á síðuna mína og ekkert þeirra er Magni, sex, froskar, guð eða annað sem við vorum að tala um.
Einhverstaðar á ég að geta séð hvað oft hefur verið flett upp á hverju orði fyrir sig og flest eru þau ekki að koma nema tvisvar í leit.
Heldurðu að þú sért ekki bara á vitlausum stað með bloggið?


Last 20 Searchengine Queries Unique Visitors
23 Aug, Wed, 10:27:20 Google: braselískt vax
23 Aug, Wed, 15:27:37 Google: helgafell í mosfellssveit
24 Aug, Thu, 18:55:03 Google: Mattías Jochumsson
26 Aug, Sat, 11:20:51 Google: upprunni yoga
28 Aug, Mon, 12:51:49 Google: regnbuxur
29 Aug, Tue, 15:37:01 Google: uppgjörsbókarar
30 Aug, Wed, 11:37:36 Google: landnámssetrið
31 Aug, Thu, 08:09:29 Google: það á að strýkja strákaling
31 Aug, Thu, 14:53:16 Google: námsflokkar kópavogs
02 Sep, Sat, 20:04:24 Google: verkir hálsi herðum
03 Sep, Sun, 19:06:06 Google: bókhaldslegar fyrningar
03 Sep, Sun, 20:20:44 Google: Vefjagigt
04 Sep, Mon, 07:32:35 Google: braselískt vax
05 Sep, Tue, 22:31:49 Google: Hekluganga
08 Sep, Fri, 10:28:15 Google: viðurkenndur bókari
09 Sep, Sat, 13:18:06 Google: "Það var eitt kvöld" eftir Jón Helgason
13 Sep, Wed, 20:42:44 Google: suðurland skolinn hella
14 Sep, Thu, 22:14:33 Google: tóta eyvindar og höllu
15 Sep, Fri, 18:52:36 Google: ráðningarstofunni
16 Sep, Sat, 00:15:54 Google: villibað

Leitarorð I

Við vinkonurnar spáðum og spekuleruðum í kvöld. Ræddum um daginn og veginn og fengum okkur sitt hvorn bjórinn á Litla ljóta andarunganum. Ég stóð fyrir ósómanum af því ég gat ómögulega neitað mér um hvítvín tvisvar í sömu vikunni og þegar ég var búin með skammtinn minn af hvítvíni og fingrafæði í boði fagfélagsins sendi ég sms á sjúkraliðann sem sjaldan segir nei þegar mér dettur einhver vitleysan í hug. Hún og Kennarinn komu með mér á kaffihús. Það er ágætt að fara af stað klukkan sex að kvöldi og vera farin heim að hygge sig fyri klukkan 10. Ég er nú ekki frá því að við vinkournar hefðum enst klukkutíma í vðbót ef Kennarinn hefði ekki verið þreyttur og með höfðuverk. Karlmenn með höfðuverk! Er þetta ekki kvenlegt sérkenni?

(enn er orðafjölda skammtari á blogger.com svo ég þarf að setja inn í tveimur hlutum!)

Leitarorð

Allavega var í umræðunni í kvöld hvort síðan hjá Sjúkraliðakennaranemanum væri opnuð 100 sinnum á dag þegar hún bloggaði um Guð, sex, Hlyn, Klepp og froska. Ég man ekki annars hvort þetta síðasta var talið upp. Ég var að hugsa um að gera tilraun og setja þetta allt hér inn. Ég minnist mjög sjaldan á Guð þar sem ég er meira farin að hallast að Óðni, Freyju, Þór og Frigg, er of mikilli púrítani til að tala mikið um sex, Hlynur er ekki á vinsældalistanum þar sem hann sendir mér aldrei sms, vinn ekki á Klepp og hef ekki haft áhuga á froskum. Ég hef nú samt tekið eftir því, þá sjaldan að ég skoða hverju fólk er að leita að þegar það fær síðuna mína á Goggle að lopapeysumunstur er vinsælt orð í þeirri leit. En ég held barast að ég hafi aldrei lent í þvi að fá 100 heimsóknir á dag á síðuna. Reyndar er þetta rólegheita síða þar sem ekkert mjög margir vita af henni. Ég komst að þeirri niðurstöðu að því fleiri sem vissu af síðunni, því færri gæti ég baktalað og hef þess vegna ekki sagt nokkrum manni í vinnuni frá henni!
Nú er komið hér inn fullt af orðum til að Googla og af þvi ég er með tæki á síðunni sem sýnir mér hvaðan er komið og að hverju er leitað get ég gert þessa mjög svo vísindalegu könnun. Ætti ég að bæta einu orði við? Íslandi?
Hvað er svo fólk frá Venuzaela að vilja hér inn? Læra íslensu eða lesa um lopapeysuprjón?

Innskrift

Skemmtilegt orð ,,innskrift" en ég nenni ekki að velta mér upp úr merkingu eða merkingarleysi þess að sinni en þetta er það sem ég þurfti að mæta í í morgun kl. rúmlega átta. Þessi tímasetning rústaði nýtilkomnum morgungöngum mínum.(Nema það hafi verið vökurnar í nótt sem rústuðu því, ég vaknaði heldur seint.)
Þessi innskrift mín fólst í því að ég fékka að hitta nokkra starfsmenn Lhs og segja þeim öllum sömu hlutina með litlum hléum og láta tappa af mér blóði. Fyrir ósköpin fékk ég að borga fáeina þúsundkalla án þess þó að hitta aðalmanninn sem ætlar að skera á mig þrjú göt næsta miðvikudag, enda hefði það ábyggilega kostað eitthvað meira en að hitta bara aðstoðar- og svæfingarlækni.
Hjúkrunarfræðingurinn sem hugsaði um innskriftarheilsu mína fann hjá sér þörf á að fullvissa mig um að hann væri fær í sínu fagi, gerði aragrúa af skurðaðgerðum á ári hverju en væri þó kornungur af sérfræðingi að vera (lítið eldri en ég), hún bauðst meira að segja til að sýna mér mynd af honum frekar en ekki neitt. Ég afþakkaði myndasýninguna, sem var nú kannski feill ég held að hana hafi virkilega langað til að sýna mér myndina sem hún var greinilega með tilbúna á skjánum. Kannski er þetta Desktop maðurinn þeirra allra.
Svona í sárabætur ætlar hún að biðja hann að sýna mér á sér andlitið áður en ég sofna á miðvikudaginn. Vonandi passar lýsingin sem hún gaf mér og þá sofna ég örugglega með sælubros á andlitinu.

Vökunótt

Ég ætla að leggja mig og vakna svo klukkan eitt til að horfa á Magna.
Við íslendingar horfum á Magna en ekki Rock Star þáttinn sko. En ég ætla ekki að kjósa í nótt. Mér er eiginlega alveg sama þó strákurinn fari ekki lengra í þessum þætti.
Hlustaði annars á fróðlegt viðtal við einn meðlima Á móti sól í dag.
Hann er hálffúll yfir öllum þessum Magnasérfræðingum sem spretta fram núna og hafa gífurlegt vit á söngvaranum þó hann stórefist um að þeir hafi nokkurntíma hlustað á hann af neinu viti fyrr og t.d. aldrei komið á ball með hljómsveitinni.
Eitthvað minntist hann á það líka að sú fræga Dilana hefið fyrr í sumar brotið tvær rúður í slotinu en ekki þótt ástæða til að gera neitt með það í þáttunum. Athyglisvert hvað afstöðu áhorfenda er stjórnað með hvað er sýnt og hvað ekki í svona raunveruleikaþáttum.

Veiðar

Ég kom við heima á leiðinni milli vinnustaða. Birgði mig upp af gulrótum og tyggjói og sprautaði vatni á geitungsræfil sem hafði brotist út úr prísundinni bak við rimlagardínurnar, skellti yfir hann glasi og hélt á honum út.
Gaf honum ekkert færi á að skríða upp úr glasinu og upp á hendina á mér á leiðinni út heldur gaf honum væna vatnsgusu í hvert skipti sem hann nálgaðist glasbrúnina.
Ég er ekki frá því að ég hafi fengið svolitla útrás við þetta.
Svei mér þá ef hann var ekki svolítið sviplíkur ferðafélaganum sem ég talaði við í símann í dag.

Súrt

Ferðafélaginn sem var búinn að lofa mér leiðsögn um óbyggðir um næstu helgi í staðin fyir fríið sem hann fékk fyrir rúmri viku sagði mér blákalt í símann áðan að hann væri að fara að þvælast um helgina á vegum vinnunar. Og þar næstu helgi líka.
Ég verð að viðurkennað að þetta fær mig til að hugsa með mér að ég hefði betur staðið á mínu um daginn og látið hann standa við sitt. Enda búin að fresta austurferð og gallblöðruaðgerð til að geta farið í auglýsta ferð.
Já mér finnst þetta frekar súrt! Það virðist vera lenska að lofa og lofa eitthvað út í loftið án þess að það hafi nokkra merkingu.

Verst að ég á eiginlega ekki 8.þús. kr. handbærar til að fara með FÍ í Emstrur í staðin.
Sjúkraliði hvað segir þú um málið?

Að vakna með sannfæringu.

Ég vaknaði í morgun með sannfæringu, eina alveg nýja. Ég var sannfærð um að þessi morgun væri einmitt rétti morguninn til að skella sér í lítið notaðar íþróttabuxur, annan skjólfatnað og strigaskó og fara út að ganga.
Þetta var klukkan 5:50 í morgun og af því mínar sannfæringar eru brothættar og óstöðugar hentist ég út án þess svo mikið sem að gefa mér tíma fyrir tannburstann. Ég náði hálftíma göngutúr rétt á meðan nóttin vék fyrir deginum.
Ég var á einhverjum tímapunkti að velta því fyrir mér að setjast upp í bílinn, finna Sjúkraliðann og ganga henni til samlætis en tilhugsunin um níðþungar töskurnar hennar og vöðvabólguverkina sem ég þjáist af þessa dagana komu í veg fyrir það. Ég er samt með örlítið samviskubit yfir að koma henni ekki til hjálpar úr því ég var komin út á annað borð.
Nú er bara að bíða og sjá hvort næstu morgnar hafi sama sannfæringarkraft.

Rignir hann fram á sunnudag?

Í dag rignir þó það sé heiðskýrt. Það er ekki svona freistandi rigningarfjörugöngveður en ef ég verð framtakssöm og rösk í vinnunni væri auðvitað tími til að fara með hund og viðra hann og mig einhverstaðar, mig langar í göngutúr í Hraununum.
Á morgun er ég til í að ganga hvort sem rignir enn eða ekki, ég er ákveðin í að eiga frí frá öllum vinnum þá og svo þarf ég að vita hvort ég er að fara í göngutúr á morgun- eða kvöldvakt.
Svo er bara að bretta upp ermum á lopapeysunni í þeirri von að það fari að hlýna á skrifstofunni og drífa hlutina frá.

Rigning, rok og þoka

Ætli það sé nokkuð flugveður í dag?
Nema fyrir fugla.

Rigning og rok.

Í svona veðri á maður að klæða sig í regngallann og ganga á reka.
Fara svo heim og fá sér heitt kakó og brauð með osti og góða bók eða handavinnu í eftirrétt.
Ekki sitja og ergja sig við að koma saman annara manna rugli. En ég vinn nú víst við það og allt tekur þetta enda- alveg þangað til í næstu törn!

Kosningar

Ég er að hugsa um að leggj míg í einn eða tvo tíma. Best væri auðvitað að hafa skjá einn + í lagi svo ég gæti farið að horfa og kjósa þegar mesta örtröðin verður gengin yfir á kosningasíðu Supernova.
Ég sleppi ekki þessum þætti. Ekki spurning!

Helgin

Var handlangari húsfélagsins í gær þegar þakið á húsinu var grunnað. Kom mér undan vekum í dag og labbaði á Miðnesheiðinni. Ferlisganga nr. 1001 og farið í gegnum varnarsvæðið sem íslendingum hefur verið óheimill aðgangur að í áratugi.
Það var svolítið sérstakt að klöngrast í gegnum girðingar vanarsvæðisins og hugsa til þess að svo stór hluti af landinu skuli hafa verið bannsvæði fyrir íslendinga. Það verður fróðlegt að sjá hvort þeir sem misstu lönd sín í eignarnáminu fá þau aftur eftir að herinn er farinn þ.e. þeir sem ekki tóku við þessum smáaurum sem átti að borga fyrir.
Keyrði yfir Dynjandis- og Hrafnseyrarheiði fyrir rúmri viku og það verður að viðurkennast að mér fannst Miðnesheiðin varla standa undir nafni í samanburði við þær. En þar urðu þó sennilega fleiri úti en á hinum tveimur, sextíu menn á fjörutíu árum er ansi ríflegt.