Hugmyndaflug

Ég hef of mikinn tíma til að láta mér detta of mikið í hug en of lítinn tíma til að framkvæma nema brot af því.
Nú ætla ég að heimsækja Kínafarann og skoða ,,skrappbækur" eða úrklippubækur eins og það heitir á íslensku. Ég er með einhvern helling af ferðasögum, jólum og áramótum sem er eftir að koma út úr tölvunni og í bók og svo eru eitthvað að þvælast fyrir mér hugmyndir að gjöfum á þessu formi.
Fór með trönurnar út í garð áðan til að nota góða veðrið eitthvað smávegis, þar er eitt stykki hálfklárað verk sem var verið að benda mér á að klára og gefa! Og einhverstarar er annað hálfklárað sem var hugsað sem gjöf í upphafi.
Ég þyrfti að klára þessar hugmyndir áður en ég byrja á næstu en er ekki að höndla það. Er reyndar búin að klára eina jólagjöf! Ég þarf bara að muna að geyma hana fram að jólum.
Svo þarf ég að ganga í dag!

Fjárans

Fjárans vesen, ég virðist hafa nælt mér í kvef einhverstaðar og ég sem er í sumarfríi!
Maður á að verða lasinn á vinnudögum, ekki frídögum.

Nám

Ég fann mér eitthvað til að læra í haust.
Ég er að hugsa um að skrá mig í Versló og læra þetta sem aldei hefur verið í boði þegar mér hefur dottið í hug að læra það.



LAT103 - Latína

Áfangalýsing
Námsefninu má í heild skipta í nokkra þætti. Um er að ræða í fyrsta lagi að nemendur geti ráðið við meðalþungan latneskan texta. Í öðru lagi verður farið talsvert í latneska orðstofna og tengsl latínu við Evrópumálin. Þá skal einnig litið til bókmennta Evrópumanna í fornöld og á miðöldum og sögu þeirra gerð nokkur skil.


Námsþættir
Farið verður í eftirfarandi námsþætti í latínu:

Hljóðfræði og framburð.
Nafnorðabeyginguna.
Sagnir í framsöguhætti.
Boðhátt og kennimyndir sagna.
Forsetningar og föll lýsingarorða og eignarfornöfn.
Tengsl latínu við önnur mál. og valda þætti í málvísindum.
Textalestur og upprunafræði (etymologíu) nýju málanna.
Bókmenntasaga Rómverja verður reifuð og helstu málaættir veraldar teknar fyrir.

Ástandið

Ástandið kallar á úrbætur áður en það versnar svo mikið að það hætti að vera bara einkenni. Þess vegna fór ég til sjúkraþjálafara og þar æfi ég mi í að tala ensku. Það voru mistök að æfa sig ekki frekar í dönskunni en hún hélt nú að allir íslendingar töluðu ensku og heldur sig við það.
Þegar ég var spurð að því hvort mér væri sama þó ég væri hjá dönskum sjúkraþjálfara sá ég ekki að þjóðernið skipti máli og komst svo að því að merkingin í spurningunni var ekki um þjóðerni heldur um málakunnáttu. Hvers vegna þarf fólk að vera svona fj. vitlaust stundum.
Ég nennti ekki að standa í því að fá annan og hef þess vegna æft mig í ensku og hana í íslensku en.... Þetta tjáskiptavandamál er frekar hamlandi.
Fór þess vegna og spurði netið út í ýmislegt sem ég hefði vilja spurja sjúkraþjálfarann minn um og hluti af svörunum er hér.
Ég sé að ég þarf að taka mig á og það hraustlega. Ég tími samt ekki að minnka vinnuna alveg strax.
--------

Langvarandi útbreiddir verkir frá stoðkerfi
Dreifðir aumir blettir á ákveðnum anatomiskum stöðum
Önnur ósértæk einkenni svo sem þreyta, svefntruflanir, höfuðverkur, .....
-------
Mikilvægt er að gera sér það ljóst, að flestir þeirra, sem hafa óþægindi frá stoðkerfinu eru ekki með gigtarsjúkdóm heldur gigtareinkenni.
------
Segja má, að hinni dæmigerði sjúklingur með vefjagigt sé kona á fertugs eða fimmtugsaldri með dreifða þráláta verki í hálsi, herðum, upphandleggjum og baki ásamt stirðleika.
------
Hún finnur fyrir almennri þreytu, vöðvamáttleysi og almennu framtaksleysi, sefur illa og vaknar sjaldnast úthvíld á morgnana. Einkennin versna í kulda og raka, við hávaða, ofreynslu, stress og kvíða. Sjúklingnum líður oft betur á sumrin, í fríum og eftir létta áreynslu svo sem göngur, sund og líkamsrækt.
--------
Eitt aðalatriðið í meðferð sjúklinga með vefjagigt er að auka almennt líkamlegt þrek þeirra.

Sandgerðisgata

Sandgerði-Keflavík var það í morgun þrátt fyrir rigninguna, eða einmitt hennar vegna. Þegar er rigning og þoka er best að halda sig á láglendi. Það ringdi svo ekkert þegar ég var komin suðureftir (vestur?) og við fengum sólskin í lokin.
Átta kílómetrar og ég vildi gjarnan að þeir hefðu reynt minna á.
Hálftími á dag- ætli ég komi því nokkurntíma inn í prógrammið.

Ég er að hugsa um að skreppa í Kolaportið.

Tiltekt

Er að læra að njóta þess að vera heima og í sumarfríi. Finn hjá mér þörf fyrir að fara eitthvað og gera eitthvað en fann mig svo í að taka til í myndasafninu á tölvunni. Kannski næ ég að vera nógu lengi í fríi til að velja einhverjar til að láta framkalla á pappír og raða svo í albúm.

Pílagrímsferðir

Í þessu herbergi, sem nú er búið að opna fram í eldhúsið, svaf ég nokkrar vikur fyrsta sumarið sem ég lifði.
Einstæð átján ára gömul móðir átti ekki kost á öðru en vinna fyrir sér í kaupamennsku hér og þar. Hún á ekki sínar bestu minningar af þessu svæði en samt var það eins og örlítil pílagrímsferð að fara með mér á staðinn og kíkja á glugga.
Þó ýmislegt sé breytt stendur sama borðið ennþá í eldhúsinu.
Við gistum í aflögðum skóla annarstaðar í sveitinni; ,,Þetta var eini skólinn sem mig hefur nokkurntíma langað til að fara í" sagði hún.
Ég get lengi kynnst nýjum hliðum á mínum nánustu- þegar ég gef mér tíma til þess.
Ég er sátt við forgangsröðunina mína þessa viku þó ég hefði stundum viljað ganga meira og keyra minna.

Þú eina.......

Þú eina hjartans yndið mitt
í örmum villtra stranda,
þar aðeins bjarta brosið þitt
mig ber til draumalanda.



Í þinni finn ég frjálsri brá
svo fagrar innri kenndir
er seiða til sín traust og þrá
í trú, sem hærra bendir.

Ég skoðaði Kaldalón í dag. Síðan hefur þetta ljóð og lag ásótt mig, og ég sem get ekki sungið. Móðir mín var með einhverjar vangaveltur um eitthvað sem hún hafði heyrt eða lesið einhverntíma um tilurð þessa ljóðs en ég finn því enga stoð á netinu amk. Ég verð að fletta þessum Guðmundi E. Geirdal upp í bókasafninu.

Sumarfríið byrjað

Ég vildi að ég hefði tíma til að gera allt. En það er bara ekki svo gott, einhverstaðar þarf að skera niður og ég er byrjuð. Fyrst skar ég niður skálavörsluna ég var búin að taka að mér, svo skar ég niður skemmtanahaldið á menningarnótt. Annars var þessi seinni niðurskurður meira vegna þreytu eftir þessa síðustu törn, nú langar mig mest til að skríða undir teppi og liggja þar næstu tvær vikur án þess að gera nokkurn skapaðan hlut. ´
Ætli ég skeri svo ekki niður keyrsluna í sumrfríinu, ég er farin að efast um að ég nenni að keyra austur til að stoppa þar í 3 eða fjóra daga.

Ég verð sennilega að fara að horfast í augu við að ég get ekki boðið mér þetta vinnuálag án þess að það komi fram einhverstaðar. Það þýðir lítið að berja höfðinu við steininn og halda að ef aðrir geti, geti ég líka.
Ég er nú samt að hugsa um að þrjóskast við einhverja mánuði í viðbót, mig langar til Kákasus.
Annars er þetta leiðinda raus bara tilkomið af þreyti og vonandi þarf ég ekki að taka svona törn alveg á næstunni.
Stefnan verður tekin vestur í kvöld eða fyrramálið. Ég ætla að sjá til seinnipartinn í dag hvernig mér líst á sjálfa mig, veður og færð.

Fjallið

Dreymdi í nótt að fjallið mitt fór að hrista af sér grjót ofan á þakið hjá mér, og síðan fór jörðin að sökkva í sæ í náttúruhamförum.
Ég sofnaði þreytt og vaknaði jafn þreytt, ekki furða þó draumfarirnar séu erfiðar.
En hugsa sér, ég kláraði enn eina uppgjörsmöppuna í gær. Þetta er barasta næstum búið.
Sem er eins gott því ég fékk dagsetningu á gallblöðrutöku í næsta mánuði og það er eins gott að vera búin að taka til á verkefnalistanum áður en að þvi kemur!

Morgunstund

Merkilegt hvað skapið er alltaf betra morguninn eftir almennilegan göngutúr. Annars er logn og sólskin svo gluggarnir hafa meira aðdráttarafl en skrifborðið.
Ég ætla rétt að vona að það verði ekki rigning alla næstu viku fyrir norðan og vestan.

Mánudagsrölt

Ég dreif Sjúkraliðann i bíltúr í kvöld. Ég ætlaði að nota mér það að eiga orðið bíl sem færi ýmislegt sem sá gamli fór ekki en... slóðin sem ég ætlaði eftir var kirfilega lokuð með keðju og hengilás svo ennþá er ég ekki farin að fara mikið út fyrir malbikið á hálfjeppanum. Við gengum þá bara eftir slóðinni niður að sjó. Það var hressandi norðanrokið í kvöld.

Ég sé annars að blogger hefur staðið í breytingum og nú setur maður link undir titilinn. Þá linkar maður bara þar líka.

Grænmetið

Ég mundi það í gærmorgun hvað það var sem ég átti að muna kvöldið áður þegar ég rembdist eins og rjúpan við staurinn við að reyna að muna í hvern ég ætlaði að hringja, það eina sem ég mundi var að ég sagði ,,ekkert mál ég hringi bara í þær strax í kvöld". Þetta er farið að vera alvarlegt vandamál þetta minnisleysi. Stutt síðan ég gleymdi að ná í flugmiða fyrir annan Super Mario bróðirinn þegar hann var að fljúga út og það kostaði heilmikið bras og pening að redda því. Kannski ég sé komin með gulrótamauk milli eyrnanna. Allavega var þetta ,,hringi" vesen á mér út af grænmetinu sem er kominn tími til að panta.
Grænmetisbóndinn sem kennarinn þekkir og hefur selt okkur lífrænt ræktað grænmeti undanfarin haust er byrjaður að taka upp gulræturnar og kálið sitt og ég ætlaði að fara að safna í pöntun hjá honum.
Hann er bara búin að taka upp helling af gulrótum en það fer allt á grænmetismarkað í dag og ég er alls ekki vissu að ég hafi tíma til að fara austur fyrir fjall og sækja mér efni. Yfirlestur og samlestur og svo ætlaði ég að vinna!
Þetta kemur í ljós.
Reyndar bauðst okkur að fara í garðinn hjá lífræna bóndanum og hirða upp annarsflokks gulræturnar ef við vildum en ég sé ekki heldur lausan tíma til þess.
Vinna! Til hvers er maður eiginlega að þessu?
Og ég sem breyti yfirvinnutímunum mínum í orlof og kemst svo aldrei í frí án þess að vinna eins og skepna langt fram á kvöld til að klára verkin frá og tek þess vegna sjaldnast út orlofstímana!

Kannski ég sé að þessu til að eiga fyrir ferð til Kákasuslandanna í vor. Ég er komin á listann þangað, og innan sviga á Lýbíulistann!

Kjölur

Ég varð að afþakka vinnu sem eldabuska í eina viku á Kili. Ég hefði gefið ýmislegt til að komast í það, meira að segja það að elda inni á fjöllum er hátíð miðað við malbikið, en ég get ómögulega svikið gömlu hjónin um að koma með þeim í frí og ég kemst ekki í frí 20. ágúst nema ég vinni eins og skepna alla næstu viku.
Til hvers er ég eiginlega að þessu?
Umm- kannski fyrir launin.

Ég er ákveðin í að fara þá í auglýsta jeppaferð inn á Kjöl um mánaðamótin og það má ganga mikið á ef á að hafa það af mér!

Óman, Kákasus, Libýa

Ómanferðin sem ég var eiginlega, næstum því ákveðin að fara í á tímabili er dottin út úr áætlun vegna ónógrar þáttöku, ég fékk þá auðvitað þá flugu í höfuðið að fara til Kákasuslandana í maí 2007 í staðin. Ekki er ráð nema í tíma sé tekið og ekki veitir af að fara að spara ef maður á að fara í 310 þús. króna ferð, það er reyndar allt innifalið í þessu (næstum). Nú ef ég fæ ekki pláss þar ætla ég að plana ferðaárið 2008 og heimsækja Gaddafi.

Það er rigning og þoka og ég nennti ekki að fara út að labba í kvöld. Setti í staðin rennilás í lopapeysu og veit ekki alveg hvort ég á að betrumbæta saumskapinn eða láta þetta gott heita.
Ég veit annars að ég verð að laga þetta til en það liggur ekki á ég get notað hana svona til að byrja með.
Svo var ég búin að lofa því að lesa yfir efni í kvöld en ég er of sifjuð til þess. Svona er að vaka fram eftir yfir sjónvarpi.
Tölvunarfræðingurinn kom heim frá Noregi í dag, klifjuð af fötum úr H&M og meira að segja keypti hún á mig líka. Ég ætti að eiga föt til skiptana eftir allt útsölurápið og þessa viðbót. Æ, það er ágætt.

Ég man að ég sagði við einhvern i dag að ég skyldi bara hringja í kvöld og tala við ....., en nú man ég ekkert í hvern og hvers vegna. Þetta ef farið að verða alvarlegt minnisleysi!
Ef ég næ nægum svefni í nótt lagast þetta kannski allt. (hvers vegna trúi ég þessu tæmipilega?)

Þögn

Mig minnir endilega að ég hafi ætlað að tjá míg um eitthvað feiknamerkilegt málefni í morgun þegar ég drattaðist á fætur en ég var búin að gleyma hvað það var áður en ég leit tölvuskjáinn augum, svo það er best að þegja.
40 mínútur í sjónvarpsþáttinn sem ég þarf eeeendilega að horfa á áður en ég fer að sofa og kannski ráð að strauja bara meðan ég bíð!

Hraunin og johnny depp

Eftir að hafa hreinsað hressilega til í samviskubitsholunni, ekki það að það sé allt búið þar, fór ég í góðan göngtúr í Hraunin vestan við Straumsvík. Var þar í óratíma, að ég held fjóra tíma af því ég þurfti að skoða ofan i hverja holu sem ég sá. Ég var að vísu búin að skrá mig á eitt námskeið áður en ég fór, nú ætla ég að bæta ritkunnáttuna. Ég man ekkert hvenær þetta námskeið er eða hvað það er langt en ég held ég hafi amk. mánuð til að finna út úr því. Endaði svo daginn á að horfa á johnny depp í pirates of the caribbean og gæti alveg hugsað mér að horfa á hann aftur. Vá!
Myndin var svo auðvitað bráðfyndin sem ekki spillti fyrir. Ég held ég stefni á að sjá hana aftur í bíó áður en það veður hætt að sýna hana. Sjúkraliði, kemurðu með?

6. ágúst

,,Dagurinn í dag er allur sá tími sem ég hef til umráða. Enginn getur komið í veg fyrir að ég noti hann vel. Ef ég geri þetta að góðum degi þá getur morgundagurinn orðið jafnvel enn betri"
Orði í tíma töluð en ég hef ekki hugmynd um hver talaði þau!
Er annars búin að vinna í að losa mig við samviskubit vegna ókláraðra verka sem eru flest kláruð og önnur undirbúin og enn er heilmikið eftir af deginum.
Kannski tími til að skrá sig á eitt námskeið og leiðrétta allar innsláttarvillurnar mínar!

rigningarganga

Ég boðaði vinnustaðagönguferði í gær án þess að gera mér miklar vonir um mætingu þar sem veðrið var snælduvitlaust og ómögulegt á mælikvarða sóldýrkenda, auk þess sem ég vissi að margir voru bókaðir í annað. Tók þess vegna með mér gulan hund og hélt af stað í Búrfellsgjána.
Það var frábært útiveður í gær, svolítil rigning og hraustlegur vindur. Mér finnst hressandi að komast út úr skrifstofumollunni og kyrrsetunum og taka á í góðu íslensku veðri.
Einn vinnufélaginn var að fá fjölskyldumeðlim heim úr útlöndum og hluta ferðarinnar var vélinni flogið myrkvaðri með dregið kyrfilega fyrir alla glugga í fylgd tveggja herþotna. Ekki langt frá þvi svæði hafa mörg hundruð almennir borgarar verið myrtir í sprengjuárásum undanfarið. Ég verð stundum hræðilega þreytt og leið á að hlusta á þetta sífelda nöldur og barlóm undan íslensku veðri.

Hefndin

Ég er alvarlega að hugsa um að vera í arfageðvonskukasti af því Sjúkraliðinn tekur fyllerí á Siglufirði fram yfir fjallgöngur með mér og til að ná mér niður á henni ákvað ég að byrta myndina hennar á netinu og senda svo meil á alla sem málið varðar og bjóða þeim að skoða.
En af því ég er ekki langrækin manneskja og jafn fljótt að rjúka úr mér og í mig verður ekkert úr því. Eða næstum ekkert.. hugmyndin var of ljúf til að henda henni alveg og ég ákvað að birta brot og brot og svo er það orðið að brotabroti.
Við nánari íhugun er ég að komast að þvi að þetta sé siðferðilega rangt og er að hugsa um að henda þessu öllu út, bæði blogginu og myndinni.
Ætli ég verði ekki að drífa mig í að Publisha þessu áður en siðferðiskenndin nær alveg yfirhöndinni.
Það verður nú að virða mér það til vorkunnar að áhugi minn á þessari myndbirtingu er að hluta til kominn vegna þess að mér finnst Sjúkraliðinn loksins vera farin að sýna og sinna þeim hæflileikum sem hennni voru gefnir í vöggugjöf og mér hefur fundist til margra ára vera sorglega vanræktir og vanþakkaðir.
Þrátt fyrir allt mitt tuð og þras hefur hún ekki snúið sér að því að rækta sjálfa sig heldur hlaupið út og suður eftir ótal vindmyllum. Ég hef stundum efast um að hún tvíburi, hallast frekar að því að hún sé fjórburi. Synd og skömm.

Mynd af mynd

Ég á mynd tekna af mynd í tómri íbúð austur á Hornafirði. Ætti ég að skella henni hér inn?
Ég er nokkuð viss um að ,,módelið" á ekki leið hér um og sæi hana þess vegna ekki en ætli ég geymi það ekki þangað til búið er að gefa honum myndina.
Þetta er flott mynd en ég var nú samt að pressa á Sjúkraliðann að gera enn betur.
Á maður ekki alltaf að gera kröfur, sérstaklega þegar maður veit að hún getur gert betur?