Vinna og sjálfboðaliðavinna

Hafrún gerir litið annað þessa dagana en að vinna og vinna meira. Sinnir svo námsgagnagerð með Kennaranum eftir launavinnuna. Það er svo sem ekkert að því að vinna smá sjálfboðaliðavinnu gegn því að fá eldaðan kvöldmat og gert við bremsur á Toyotu, að ég tali nú ekki um þegar þarf að fara að skipta um dembara og kúplingu (sem átti helst að gerast í gær)
Fékk svo upphringinu í dag og var boðuð í sjáfboðaliðavinnu í Emstrunum 9-11 sept. Ekki spurning, ég fer ef ég get gengið upprétt sem er alveg á mörkunum þá daga sem ég sinni líkamlegri heilsu minni og hjóla um Kópavoginn þveran og endilangan. Þá daga eða öllu heldur dagana eftir það er bakið of slæmt til að rétta almennilega úr því. Ætli ég geti skilað hjólinu.

Má bara ekki vera að þessu

en sakna þess nú samt.

Að bugast

Hafrún hlýtur að vera að bugast, hún nennti ekki í jeppaferð um helgina! Hvort það hafði eitthvað með veðurspána, menningarnóttina og þreytu að gera veit ég ekki en mig grunar það. Það hljómaði líka eitthvað svo notalega að vera bara heima hjá sér og gera sem minnst þessa helgina. Fara á flugeldasýningu og útitónleika á hafnarbakkanum, rölta um bæinn án þess að ætla sér að sjá nokkuð sérstakt, bara taka því sem að augum og eyrum ber, kaupa sér regnhlíf ef þarf eða sleppa því ef ekki rignir. Hversdagsleg smáatriði verða stundum notaleg eftir spanið við að koma sem mestu í verk á stuttu íslensku sumri.
Þjórsárverin voru fín þó ég ofkældist á heimleiðinni. Ég veit ýmislegt sem ég vissi ekki um áður, hvernig rústir myndast, að Gullbráin er steinbrjótur og þó það sé ekki þverfótað fyrir henni á Íslandi vex hún ekki nema á þremur öðrum stöðum í Evrópu þar sem allt jarðrask er bannað til að vernda hana.
Ég sá á freðmýrarrústir og ég sá rústir eftir mannabústaði. Það fór hrollur um mig við tilhugsunina um Höllu hans Eyvindar búandi í torfkofa á stærð við herbergið mitt, út í mýri en þægindin voru helst þau að Eyvindur leiddi lindarvatnið undir húsið svo það hefur ekki þurft að ösla mýrina til að ná í vatn. Á hverju lifði fólkið þarna inni í óbyggðum? Það er að vísu nokkuð öruggt að þau færðu sig til byggða á haustin og voru í vinnumennsku hér og þar yfir veturinn en lögðust út á sumrin. Ég gæti alveg hugsað mér að leggjast út á sumrin en ekki í torfkoma eða hella með slaga og raka lekandi niður veggina. Útilegumennska virkar ekki aðlaðandi í skúraveðri uppi á reginöræfum.

Fjandinn

Ég ætlaði að setjast við tölvuna og skrifa langa og mikla klausu um ekkert markvert en fékk þá kaffipöntun. Úr þvi það var ekki bloggfriður ætlaði ég að taka upp handavinnuna með kaffinu en finn hvergi nokkurstaðar möppuna með uppskriftinni sem ég ætlaði að nota og það er helv. pirrandi og þegar ég fór að jafna mig á því kom Tölvunarfræðingurinn minn heim og byrjaði að tala. Ég held ég fari að sofa.

Lítil lífsmörk

Ég held að rútubílstjorin einn hafi ákveðið að gera útaf við mig í dag. Úr því að honum tókst ekki að velta rútunni eða hræða úr mér líftóruna hefur hann ákveðið að kála mér úr ofkælingu!
Ég held að ég þurfi að fara í heit bað næsta klukkutímann eða svo til að komast upp í 37°.

Eitt hjól og tveir bílar

Já, það er ekki hægt að neita því að ég á nóg af tækjum til að komast leiðar minnar.
Græni bíllinn minn þarfnast viðgerðar og nýs geymis til að fara í gang átakalaust, ætli ég verði ekki að fara að splæsa á hann einhverri andlitslyftingu svo hann verði söluhæfur. .
Rauði bíllinn minn fer mögnunarlaust í gang en ég veit ekki hvenær kúplingin (tengslin) hættir að virka, ég hef á tilfinningunni að það verði stutt í það.
Þetta minnir svolítð einhverjar sögur sem ég las stundum þegar gríslingarnir mínir voru kornung, Græni hatturinn og Bláa kannan eða eitthvað álíka.
Svo á ég hjól með afturljósi sem virkar ekki og ég sem man ekki betur en ég keypti rafhlöður í bæði ljósin. Annars er ég búin að prufukeyra hjólið mitt og ótrúlegt en satt ég kann þetta ennþá.
Kennarinn varð svo öfundsjúkur þegar ég heyrði í honum í kvöld og sagði honum að ég væri að hugsa um að skrópa í vinnunni og fara bara út að hjóla að hann keypti sér hjól í Europrise og ætlaði að hjóla með mér. Hann fékk sitt hjól bara ekki samsett og þegar hann var búin að púsla því saman og ég búin að vinna (ég hætti auðvitað ekkert til að fara að leika mér heldur kláraði) var orðið of framorðið til að hjóla í Skerjafjörðinn eða eitthvað álíka svo ég hjólaði bara á Digranesveginn og kíkti á Sjúkraliðann.
Sjúkraliðann sem sat yfir kúfuðum skálum af súkkulaði og vínberjum, drakk rauðvín og steikti humar handa systur sinni sem var í heimsókn. Ég fékk humar en sleppti rauðvíninu og mest öllu súkkulaðinu. Hjólaði svo heim og lét þær um að fylgja FRÆNKUnni á deitið. Reyni af fremsta megni að predika ekki hitt og þetta en tekst það misjafnlega vel.

Árnes á morgun og Þjórsárver á sunnudag og ég er svo heppinn að Píparinn er að vinna í útlöndunum og ég má nota vinnubílinn hans í staðinn fyrir tjald. Út með verkfærin og inn með dínuna og svefnpokann.
Það sér vonandi fyrir endann á einni litlu vinnunni minni og mikið hlakka ég til að fara niður í rúmlega hundraðprósent!

Ég sá auglýst námskeið sem mig langar á og ef ég verð með kollinn og minnið í lagi eftir helgina ætla ég að hringja og athuga hvað það kostar.

Skráði mig í jeppaferð um næstu helgi og svo þyrfti ég að finna mér eina helgi til að skreppa austur en það verður sennilega ekki fyrr en í september. Kannski ég fari bara og smali þar í haust. Verð orðin svo hraust af öllum hjólreiðunum þá.

Ég á

hjálm-
rauðan og svartan hjálm sem sjúkraliðinn valdi handa mér í dag. Hjálmurinn var aukabúnaður sem ég keypti með hjólinum mínu í dag. Jamm, ég er orðinn allsvakalega hamingjusamur eigandi Trek 7100 götuhjóls!



Hjólið sjálft kostaði mig ekki nema 24.300 krónur en allt sem við á að vera kostaði mig rúmar 9.000 í viðbót svo það er eins gott að ég hjóli á næstunni.
Byrja frá og með morgundeginum þegar hjólið verður tilbúið.

Ætla samt ekki að hjóla á því heim, það er alveg af og frá.
Ég byrja á einhverju auðveldara.


Skrapp í göngtúr í gær, ég og sjúkraliðinn tókum stefnuna á Úlfarsfellið og prófuðum nýja uppgöngleið í þetta skiptið. Fórum í skóræktina og ætluðum þaðan upp. Ég neitaði fyrir rest að ganga nokkurn hlut, það var þegar ég uppgötvaði að hettan á úlpunni minni var ágætis poki til að tína ber í og ég bograði bara af einni þúfunni á aðra og tíndi bláber í úlpuhettuna og sjálfa mig. Berin hefðu mátt vera aðeins þroskaðri en þau voru samt fín út í skyrið mitt í hádeginu. Hrútaberin sem við rákumst á þarna líka voru nærri þvi fullþroskuð og svo flott á litinn að ég missti mig í að tína þau líka.
Þetta var nú eiginlega illa gert gagnvart Sjúkraliðanum sem hafði fullan hug á að hlaupa upp á einhvern topp en hún verður bara að þola þessa toppafælni mína þegar hún er með mér. Í staðinn fær hún að tala og tala og tala út í eitt þegar henni hentar.
Ég er farin að hallast að því að hún smitist stundum af talanda í vinnuni og þegar hún fer með manni út að labba eftir þær vaktir, eins og í gær, verður hún eins og eitthvað umhverfishljóð sem maður tekur ekki eftir fyrr en það hættir að heyrast.
Ég vona bara að hún taki ekki upp á því að breytast í fugl eða flugu.

Þjórsárver um helgina en það hefur ekkert hreyrst frá Jeppaeigandanum sem ætlaði að lofa mér að sitja í í jeppaferðinni í Skaftárafrétt!
Nú ég hef þá alltaf Menningarnóttina í Reykjavík og hjólið mitt ef ég fæ ekki að jeppast.

Rúnturinn, gulrætur og íslenska

Það var fallegt útsýnið af Reykjanesbrautinni í nótt. Skýjað með köflum og himinninn sýndi okkur öll þau litbrigði sem hann á til á ágústnóttu. Ég er nú samt ekki viss um að það hafi verið þess virði að keyra út í Keflavík til að skoða útsýnið og mannlífið. Ég var orðin ansi syfjuð þegar ég var búin að skil af mér seinasta farþega og komin heim að sofa. Held kannski að ég hafi sofnað í strigaskónum.
Í Árbæjarsafninu er sýning á verkum úr þæfðri ull og ég er búin að setja stefnuna þangað á eftir. Ætla að taka með mér einn Sjúkraliða og hitta Gjaldkerann á svæðinu og færa henni fimm kíló af gulrótum. Fékk nfl. gulrótarsendingu frá birgjanum í gær og þær eru sælgæti. Pínulitlar, kræklóttar lífræntræktaðar gulrætur eru frábært snakk.

Já og svo fékk ég bréf frá Verði Íslandstryggingu og í niðurlaginu stóð:

,,Okkur hlakkar til að hafa þig áfram í viðskiptum"

Ég veit ekki hvort ég á að vera áfram í viðskiptum við aðila sem geta ekki komið frá sér fjölpósti á skammlausri íslensku.

Hætt að rata

Er bara hérumbil hætt að rata hérna inn en það tókst. Í því að ég upphugsaði allt það sem átti að skrifa um í kvöld kom Tölvunarfræðingurinn heim og þurfti að tjá sig um hitt og þetta og ég gleymdi því sem ég var að hugsa. Svona er lífið og ég held ég barasta fari að sofa.

Las annars Fréttablaðið í gær. Þar sagði frá bílum sem fóru illa af því það ,,flóði yfir vélarnar"

Hvað hefði ég til að hneysklast á ef ég læsi ekki Fréttablaðið!

Heiðríkja

Það er heiðríkja í kolli sjúkraliðans en ekki á suðvesturhorninu almennt. Ég nenni ekki að príla upp á hól í dag en ég á nú samt frí. Ég ætla að athuga hvort ég kann að eiga frídag.